Þáttur 2. Fimmtudagurinn 23.06.2011
23. júní 2011
BBQ rif
Rifin sjálf má forelda á þrjá vegu, hægt er að sjóða þau í c.a 40 mín áður en þau fara á grillið. Elda þau í ofni við 100° í c.a 2 ½ tíma. Einnig er hægt að grilla þau á efri grind á lágum hita í c.a 70-80 mín áður en sósan fer á rifin, sem ég ætla að gera núna.
Setja rifin á efri hillu á grillinu, og lagið sósuna.
Sósa
- 2 dl tómatsósa
- 200g púðursykur
- 3 stk hvítlaukusrif
- 4 msk teriyaki sósa
- 3 msk chillisósa
- Meira Chilli ef þið viljið, t.d tabasco eða ferskan chilli.
Þegar kjötið er tilbúið eftir c.a 70 mín er það tekið af grillinu og sósunni pennslað á rifin, setjið á grillið og grillið í c.a 15 mín eða þar til fallegur litur er kominn á sósuna á kjötinu. Gott er að pennsla aftur þegat tíminn er hálfnaður.
Spínat salat
- c.a 50g pekanhnetur
- 1 msk sykur
- 1 poki spínat
- c.a 7stk jarðaber
- c.a 20-30 stk bláber
- balsamic glaze
hitið pekanhneturnar á þurri pönnu, þegar þær eru aðeins farnar að taka lit er sykur blandað saman við. Takið af hitanum og hrærið sykurinn vel saman við hneturnar, kælið. Setjið spínatið á fallegan disk, skerið jarðaberin niður og setjið yfir ásamt bláberjum. Saxið hneturnar niður og stráið yfir, sprautið þá balsamici yfir og berið fram með rifjunum.
Kjúklingaleggir og vængir
1 dós passata tómatar 500g
1 dl teriyakesósa
1 msk hunang
2 stk hvítlauksgeirar
¼ tsk kanill
¼ tsk negull
1tsk Tabasco (eftir smekk)
2 stk stjörnuanis
Allt sett saman í matarvinnsluvél og maukað vel saman, hellið leginum yfir kjúklinginn og látið standa í c.a 3 klst eða yfir nótt.
Grillið kjúklinginn og pennslið tvisvar með afganginum af leginum yfir bitana. Setjið á efri hilluna og pennslið í síðasta sinn og klárið að elda.
Einn poki af snakki
Gráðostur í bitum
Tabasco sósa
Rifinn ostur
Snakkið er sett í eldfast mót, gráðostinum er blandað saman við og dass af tabaskó sósunni. Rifni osturinn er svo settur yfir. Setjið á grillið, ekki með hita undir og eldið þar til osturinn er bráðinn.
Sósu dipp
- 1 dós sýrður rjómi
- 3 msk grískt jógúrt
- 100g gráðostur
- 1 msk hunang
- Salt og pipar
Öllu er blandað vel saman. Og borið fram með kjúklingnum og snakkinu
Rósmarin kryddaður lambahryggur
- 1.stk lambahryggur
- Ólífuolía
- ferskt rósmarin
- hvítlaukur
- Salt og pipar
Skerið fitu endana af hryggnum og snyrtið vel. Skerið niður með kjötinu sitthvoru megin við hryggjarsúluna skerið rákir í fituna ofaná filleinu. (fiskimunstur)
Rífið rósmarin gróflega niður og saxið hvítaukinn gróflega niður. Setjið kjötið í fat og nuddið olíunni í kjötið og kryddið með salt, pipar, hvítlauk og rósmarin og látið standa í smá stund.
Kartöflur
- 3 skt litlar kartöflur
- ½ stk shalottulaukur
- Ferskt timjan
- Salt
- Ólífuolía
Skerið djúpan kross í kartöflurnar, setjið þær í álapappír og kryddið vel með salti. Setjið c.a 1 msk af olíu og eina góða grein af timjan á kartöflurnar. Lokið bögglinum vel.
Setjið böggulinn á grillið í c.a 30 mín. Opnið þá böggulinn og athugið með hvort þær séu tilbúnar, grillið áfran ef svo er ekki með böggulinn opinn.
Grillið kjötið við háan hita til að byrja með, fyrst á fitunni og snúið svo við þegar fitan er vel grilluð. Passið að það getur komið mikill eldur af fitunni á kjötinu þannig að það þarf að færa kjötið frá eldinum eins og kostur er. Setjið kjötið á efri hæð og lækkið hitann. Eldið kjötið upp í c.a 57°-60° það gæti tekið c.a 20 mín á efri hillu við meðal hita. Látið kjötið standa á borði í c.a 5 mín áður en það er skorið niður.
Fetaost blanda
- 1 stk Paprika
- 2-3msk ólífuolía
- Safi úr hálfri sítrónu
- Hnefi af steinselju
- 1 krukka fetaostur í kryddolíu
- Salt og pipar
Paprikan er grilluð við háan hita með kjötinu. Setjið á efri hillu og eldið áfram. Blandið saman olíu sítrónusafa og steinselju. Myljið ostinn saman við og kryddið með salt og pipar. Skerið paprikun niður í þunnar ræmur og blandið saman við.
Berið fram með kjötinu
Piparsósa
- 1 dós sýrður rjómi
- 3 msk grískt jógúrt
- 1 msk hunang
- 1 askja piparostur 85g
- Salt og pipar
- Blandið öllu vel saman og látið standa í c.a 1 klst. Berið svo fram með kjötinu.
